ܚܕܪ ܒܝܬ ܥܬܝܩ̈ܬܐ
ܚܕܪ ܒܝܬ ܥܬܝܩ̈ܬܐ
ܐܝܬܠܗ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܐܢܢܩܝܘܬܐ ܘܕܝܠܢܝܘܬܐ ܦܪܝܫܬܐ، ܒܥܠܬܐ ܕܝܠܗ ܗܘ ܩܕܡܝܐ ܘܠܚܘܕܝܐ، ܓܘ ܩܠܝܡܐ ܕܟܘܪܕܣܬܢ ܘܥܝܪܩ، ܕܝܠܢܝܐ ܒܢܛܪܬܐ ܘܬܪܨܬܐ ܘܓܠܚܬܐ ܕܟܠ ܡܢܕܝ ܕܐܝܬܠܗ ܐܣܘܪܐ ܒܝܪܬܘܬܐ ܡܪܕܘܬܢܝܬܐ ܘܐܡܢܝܬܐ ܘܥܡܡܝܬܐ ܕܒܢܝ̈ ܥܡܢ ، ܗܘܠܢܝܐ ܘܠܐ ܗܘܠܢܝܐ، ܒܡܐ ܕܚܒܫ ܡܢ ܠܒܘܫ̈ܐ ܥܡܡܝ݁ܐ ܘܩܢܝ̈ܬܐ ܝܪ̈ܬܘܬܢܝܐ ܘܥܡ ܡܐ ܕܚܒܫ ܐܘܢܐ ܡܪܕܘܬܢܝܐ ܡܢ ܨܘܪ̈ܬܐ ܘܟܪܝܘܬܐ ܡܢ ܫܪܒܐ ܕܚܝ̈ܐ ܕܒܟܝܪܐ ܕܩܘܝܡܐ ܐܘܡܬܢܝܐ ܘܡܪܕܘܬܢܝܐ ܕܥܡܢ، ܘܥܡ ܫܘܦܗ ܦܪܝܫܐ ܩܘܪܒܐ ܕܬܠܐ ܕܩܨܪܐ ܥܬܩܝܐ ܒܥܢܟܒܐ، ܘܥܕܬܗ ܥܬܝܩܬܐ ( ܡܪܝ ܓܝܘܪܓܝܣ).
ܫܬܐܣܬܐ
ܡܢ ܫܬܐܣܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܐܐ ܫܢ̄ܬܐ ܕ 2007 ، ܦܠܚܠܗ ܡܕܒܪܢܗܿ ܓܘܢܝܐ ܡܫܢܝܐ ܕܟܬܘܪ “ܣܥܕܝ ܐܠܡܠܚ” ܒܡܬܒܬܐ ܕܦܣܘܥܬܐ ܩܕܡܝܬܐ ܠܫܬܐܣܬܐ ܘܒܪܝܬܐ ܕܒܝܬ ܥܬܝܩ̈ܬܐ ܕܝܠܢܝܐ ܒܝܪܬܘܬܐ ܣܘܪܝܝܬܐ، ܓܘ ܐܬܪܗ، ܡܥܒܕܢܐ ܒܡܐ ܕܚܙܐܠܗ ܓܘ ܫܢ̈ܗ ܒܓܠܘ̈ܬܐ، ܕܗܘܐ ܗܢ ܒܝܬ ܥܬܝܩ̈ܬܐ ܕܝܠܢܝܐ ܒܢܛܪܬܐ ܕܐܫܛܪ̈ܐ ܘܟܬܒ̈ܐ ܘܨܘܪ̈ܬܐ ܝܪ̈ܬܘܬܢܝܐ ܛܝܡܢ̈ܐ ܘܫܛܪܬܐ ܕܥܝܕ̈ܐ ܘܬܣܦܝ̈ܬܐ ܕܒܢܝ̈ ܥܡܢ، ܘܦܪܝܫܐܝܬ ܒܓܠܚܬܐ ܕܟܠ ܡܐ ܕܐܝܬܠܗ ܐܣܘܪܐ ܒܚܝܘܬܐ ܝܘܡܝܬܐ ܕܥܡܐ ܦܘܠܚܢܗ ܩܕܡܝܐ ܝܗ̄ܘܐ ܙܪܘܥܬܐ ܘܝܕܥ ܫܒܝܠ̈ܐ ܕܦܘܠܚܢܐ ܕܙܩܪ̈ܐ ܕܐܝܕܐ ܘܚܕܟܡܐ ܨܢܘܥܝ̈ܬܐ ܥܝܕܝ̈ܐ، ܘܥܡ ܠܒܼܘܫ̈ܐ ܥܡܡܝ̈ܐ ܘܝܪ̈ܬܘܬܢܝܐ ܕܩܘܪ̈ܝܐ ܘܦܢܝ̈ܬܐ ܡܫܚܠܦ̈ܐ ܕܒܢܝ̈ ܥܡܢ.
ܦܝܫܠܗ ܡܫܘܬܐܣܐ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ 2009 ܓܘ ܚܕ ܒܝܬܐ ܙܥܘܪܐ ܐܓܼܝܪܐ ܒܥܢܟܒܐ، ܚܒܫܠܗ ܩܢܝ̈ܬܐ ܝܪ̈ܬܘܬܢܝܐ ܐܢܝ ܕܟܡ ܟܢܫܠܗܘܢ ܡܢ ܩܘܪ̈ܝܐ ܘܦܢܝ̈ܬܐ ܕܥܡܢ. ܒܬܪ ܗܕܟ ܩܝܡܠܗܿ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܕܥܝܪܩ ܗܘܝܐ ܒܣܝܡܬܐ ܒܒܢܝܬܐ ܕܚܕ ܒܢܝܢܐ ܕܝܠܢܝܐ ܘܥܒܕܐܠܗ ܡܕܒܪܢܘܬܐ ܝܨܦܐ ܒܫܘܓ̄ܠ̈ܗ ܒܫܡܐ ܕܡܕܒܪܢܘܬܐ ܕܝܪܬܘܬܐ ܘܐܡܢ̈ܐ ܥܡܡܝ̈ܐ ܣܘܪ̈ܝܝܐ ܗܝ ܕܫܘܚܠܦܠܗܿ ܒܬܪ ܗܕܟ ܠܡܕܒܪܢܘܬܐ ܕܝܪܬܘܬܐ ܘܒܝܬ ܥܬܝܩ̈ܬܐ ܣܘܪܝܝܐ.
ܟܕ ܦܝܫܠܗ ܦܬܝܚܐ ܒܢܝܢܐ ܚܕܬܐ ܓܘ ܢܝܣܢ 2011 ܕܚܒܫ ܥܡ ܚܕ ܐܘܢܐ ܫܦܝܪܐ ܕܟܫܝܪ̈ܘܬܐ ܡܪ̈ܕܘܬܢܝܐ ܘܐܡܘܪ̈ܘܬܐ، ܬܪܝܢ ܐܘܢ̈ܐ ܕܓܠܚܐ، ܚܒܫ ܚܕ ܡܢܝܗܝ ܓܠܚ̈ܐ ܝܪ̈ܬܘܬܢܝܐ ܘܠܒܼܘܫ̈ܐ ܥܡܡܝ̈ܐ ܕܦܢܝ̈ܬܐ ܡܫܚܠܦ̈ܐ ܕܒܢܝ̈ ܥܡܢ، ܘܚܒܫ ܐܘܢܐ ܬܪܝܢܐ ( ܡܪܕܘܬܢܝܐ) ܓܘ ܛܒܩܐ ܥܠܝܐ ܐܪܫܝܦܐ ܨܘܪܬܢܝܐ ܕܒܟܝܪ̈ܐ ܕܩܘܝܡܐ ܡܪܕܘܬܢܝܐ ܘܪܢܝܝܐ ܕܥܡܢ ܥܡ ܚܕܐ ܟܪܝܘܬܐ ܚܕܪ ܫܘܡܠܝܝ̈ܗܝ ܘܬܫܡܫܝ̈ܬܝܗܝ، ܘܡܢܝܢܐ ܡܢ ܣܘܪ̈ܛܐ ܘܓܠܝܘܢ̈ܐ ܘܡܓܠ̈ܐ ܥܬܝܩ̈ܐ ܒܫܘܪ̈ܝܐ ܕܕܪܐ ܥܒܝܪܐ ܘܥܡ ܡܢܝܢܐ ܡܢ ܡܣܓܠܢܘ̈ܬܐ ܒܨܝܪ̈ܐ ( ܝܩܝܪ̈ܐ) ܕܡܘܣܝܩܝ̈ܐ ܘܙܡܪ̈ܐ ܣܘܪ̈ܝܝܐ.
ܡܢـــــــܬܐ ܕܚــــــܘܕܬܐ
ܒܥܕܢܐ ܕܫܩܠܬܐ ܕܩܛܥܐ ܚܕܬܐ ܕܦܝܫ ܡܬܒܐ ܥܡ ܐܝܬܘ̈ܬܐ ܕܒܝܬ ܥܬܝܩ̈ܬܐ ܣܘܪܝܝܐ، ܫܪܝܐ ܥܡܠܝܬܐ ܕܒܨܝܬܗ ( ܨܚܨܝܬܐ) ܘܬܚܡܬܐ ܕܥܡܠܝ̈ܬܐ ܕܢܛܪܬܐ ܘܚܘܕܬܐ ( ܬܪܨܬܐ) ܐܢܝ ܕܣܢܝܩܐܝܠܗ ܥܠܝܗܝ. ܟܕ ܦܝܫܝ ܫܩܝ̈ܠܐ ܨܘܪ̈ܬܐ ܠܗܢ ܩܛܥܐ ܩܕܡ ܥܡܠܝܬܐ ܕܚܘܕܬܐ ܘܒܬܪܗܿ ، ܒܪܐ ܬܡܣܬܗ ܘܕܟܝܬܗ ܒܡܦܠܚܬܐ ܕܗܘܠ̈ܐ ܕܝܠܢܝܐ ܘܒܬܘܩܢ̈ܐ ܢܛܪܝ ܓܘܫܡܐ ܕܩܛܥܐ ܘܥܘܡܪܗ ܬܫܥܝܬܢܝܐ ܘܐܝܟܢܘܬܗ ܘܕܪܓܐ ܕܚܘܣܪܢܗ. ܒܬܪ ܬܡܡܬܐ ܕܥܡܠܝܬܐ ܕܚܘܕܬܐ ܦܝܫܝ ܡܣܘܓܠ̈ܐ ܡܘܕܥܢܘ̈ܬܐ ܟܡܝܠ̈ܐ ܚܕܪ ܩܛܥܐ ܓܘ ܣܓܠ̈ܐ ܕܒܝܬ ܥܬܝܩ̈ܬܐ ܕܚܒܫܝ ܫܡܐ ܕܩܛܥܐ ܘܥܘܡܪܗ ܘܬܫܥܝܬܐ ܕܚܘܕܬܗ، ܒܥܕܢܐ ܕܚܘܕܬܗ، ܒܬܪ ܗܕܟ ܫܡܐ ܕܦܢܝܬܐ ܐܘ ܩܪܝܬܐ ܕܦܝܫܗ̄ܘܐ ܡܘܦܠܚܐ ܗܢ ܩܛܥܐ ܓܘܗܿ ܘܫܡܐ ܕܫܕܬܢܐ ܗܘ ܕܩܝܡܠܗ ܒܚܘܕܬܗ ( ܬܪܨܬܗ) ܓܘ ܒܝܬ ܥܬܝܩ̈ܬܐ ܒܬܪ ܗܕܟ ܦܝܫܐ ܫܩܝܠܬܐ ܨܘܪܬܐ ܠܗܢ ܩܛܥܐ ܘܝܗ̄ܒܠܬܗ ܫܫܠܬܐ ܪܩܡܝܬܐ، ܐܢ ܦܝܫ ܓܠܝܚܐ ܚܕܪܫܐ ܓܘ ܐܘܢܐ ܕܓܠܚܐ، ܘܒܗܦܟܐ ܦܝܫ ܩܠܝܦܐ ܒܗܘܠܐ ܕܦܠܝܢܐ ܘܢܛܪܬܗ ܓܘ ܠܒܝܫ̈ܬܐ ܕܝܠܢܝ̈ܐ ܐܝܟ ܦܣܘܥܬܐ ܐ̄ܚܪܝܬܐ ܡܢ ܦܣܘܥ̈ܝܬܐ ܕܥܡܠܝ̈ܬܐ ܕܚܘܕܬܐ، ܒܬܪ ܗܕܟ ܕܪܝܐ ܒܒܝܬ ܐܘܨܪܐ. ܟܕ ܐܝܬܠܗܿ ܡܢܬܐ ܕܚܘܕܬܐ (ܬܪܨܬܐ) ܣܓܠ̈ܐ ܒܟܠܝܗܝ ܐܝܬܘ̈ܬܐ ܥܡ ܪ̈ܩܡܝܗܝ ܘܫܘܡܗܝ̈ܗܝ ܘܨܘܪ̈ܬܝܗܝ. ܫܩܠܝ ܫܕܬܢ̈ܐ ܕܡܢܬܐ ܕܚܘܕܬܐ (ܬܪܨܬܐ) ܕܘܪ̈ܬܐ ܕܪ̈ܫܘܬܢܝܐ ܐܡܝܢܝ̈ܐ ܕܦܝܫܝ ܒܚܝܪ̈ܐ ܦܠܚ̈ܐ ܓܘ ܦܘܠܚܢ̈ܐ ܕܚܘܕܬܐ ܕܩܛܥ̈ܐ ܝܪ̈ܬܘܬܢܝܐ ܓܘ ܫܘܬܐܣ̈ܐ ܡܬܕܝܠܢܝ̈ܐ ܒܚܩܠܐ ܕܥܬܝܩ̈ܬܐ ܘܝܪܬܘܬܐ.
ܐܝܬܠܢ ܣܒܪܐ ܕܗܘܐ ܫܘܦܢ ܐܠܟܬܪܘܢܝܐ ܚܕ ܡܢ ܫܒܝܠ̈ܐ ܒܫ ܐܢܢܩܝ̈ܐ ܕܡܥܕܪܢܝ ܝܠܘܦ̈ܐ ܘܒܨܘܝ̈ܐ ܓܘ ܒܘܨܝܝܗܝ ܝܘܠܦܢܝ̈ܐ ܕܐܝܬܠܗܘܢ ܐܣܘܪܐ ܒܡܪܕܘܬܐ ܣܘܪܝܝܬܐ ܘܟܠ ܡܐ ܕܐܝܬܠܗ ܐܣܘܪܐ ܒܡܕܝܢܝܘܬܢ ܘܬܫܥܝܬܢ.
ܡܢܬܐ ܕܨܢܥܬܐ ܕܣܩܠ̈ܐ ܥܡܡܝ̈ܐ
ܦܝܫܝ ܥܒܝܕ̈ܐ ܣܩܠ̈ܐ ܘܐܟܣܣܘܪ̈ܐ ܕܡܝܢ̈ܐ ܒܝܪ̈ܬܘܬܢܝܐ ܒܫܩܠܬܐ ܕܨܘܪ̈ܬܐ ܥܬܝܩ̈ܐ ܐܢܝ ܕܩܢܐܠܝܗܝ ܘܓܠܚܠܝܗܝ ܒܝܬ ܥܬܝܩ̈ܬܐ ܐܘ ܒܫܩܠܬܐ ܕܒܚܝܪ̈ܘܬܐ ܘܡܘܕܥܢܘ̈ܬܐ ܕܫܟܝܢ݁̈ܐ ܕܘܟܬܢܝ݁̈ܐ ܡܢ ܒܢܝ̈ ܥܡܢ ، ܐܝܟܐ ܕܐܝܬ. ܘܒܣܢܕܬܐ ܠܐܢܝ ܨܘܪ̈ܬܐ ܘܡܘܕܥܢܘ̈ܬܐ، ܩܝܡܝ ܫܕܬܢ̈ܐ ܕܡܢܬܐ ܕܣܩܠ̈ܐ ܒܒܝܬ ܥܬܝܩ̈ܬܐ ܒܪܫܡܬܝܗܝ ܓܗܐ ܩܕܡܝܬܐ ܒܬܪ ܗܕܟ ܓܒܝܬܐ ܕܗܘܠ̈ܐ ܚܫܝܚ̈ܐ ܒܥܝ̈ܐ ܠܨܢܥܬܝܗܝ ܒܬܪ ܗܕܟ ܦܝܫܐ ܥܒܝܕܬܐ ܓܠܦܬܐ ܥܠܝܗܝ ܒܐܘܪܚܐ ܕܡܐܢ̈ܐ ܡܬܕܝܠܢܝ̈ܐ.
ܕܫܢܐ( ܒܝܬ ܬܐܓܘܪܬܐ ܝܪܬܘܬܢܝܐ)
ܕܫܢܐ، ܝܠܗܿ ܚܕܐ ܙܘܝܬܐ ܕܫܘܘܩܐ ܓܘܝ̈ܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܝܗ̄ܒܠ ܦܘܪܣܐ ܠܡܒܥܢ̈ܐ ܘܡܒܥܢ̈ܝܬܐ ܡܢ ܒܢܝ̈ ܥܡܢ ܠܓܠܚܬܐ ܘܡܘܕܥܢܘܬܐ ܕܦܘܠܚܢܝ̈ܗܝ ܐܘܡܢܝ̈ܐ ܕܐܝܕܐ ܕܡܝܢ̈ܐ ܘܫܩܝܠ̈ܐ ܡܢ ܡܕܝܢܝܘܬܐ ܢܗܪܝܢܝܬܐ ܘܝܪܬܘܬܐ ܣܘܪܝܝܬܐ ܫܪܫܝܬܐ، ܘܦܪܝܫܐܝܬ ܦܘܠܚܢ̈ܐ ܕܐܝܕܐ ܕܢܫ̈ܐ ܣܘܪ̈ܝܝܬܐ، ܒܚܕܐ ܫܪܝܬܐ ܒܝܕ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܣܢܕܬܐ ܕܢܫ̈ܐ ܣܘܪ̈ܝܝܬܐ ܦܠܚܝ̈ܬܐ ܘܡܩܪܒܬܐ ܕܥܘܕܪܢܐ ܐܠܝܝܗܝ ܒܡܘܕܥܢܘܬܐ ܕܦܘܠܚܢܝ̈ܗܝ ܘܡܬܡܨܝܢܘܬܐ ܕܐܢ̄ܬܬܐ ܒܐܣܟܝܡܐ ܓܘܢܝܐ. ܘܐܦ ܗܕܟ ܡܩܪܒ ( ܕܫܢܐ) ܚܕ ܦܘܪܣܐ ܕܗܒܢܝܐ ܠܕܲܝܵܪ̈ܵܝܹܐ ܘܣܥܘܪ̈ܐ ܕܘܟܬܢܝ̈ܐ ܘܢܘܟܼܪ̈ܝܐ، ܠܩܢܝܬܐ ܕܕܟܪ̈ܐ ܡܕܡܝܢ̈ܐ ܡܢ ܩܝܡܝ̈ܬܐ ܘܦܬܟܼܪ̈ܐ (ܨܠܡ̈ܐ) ܘܚܙܘ̈ܐ ܥܬܩܝ̈ܐ، ܐܘ ܕܫܢ̈ܐ ܕܟܼܪ̈ܝܐ ܠܚܒܪ̈ܝܗܝ ܘܚܒܝܒܝ̈ܗܝ ܐܢܝ ܕܛܥܢܝ ܥܘܡܩܐ ܕܡܕܝܢܝܘܬܐ ܢܗܪܝܢܝܬܐ ܘܦܝܫܠܗܘܢ ܡܬܘܪܨܐ ܒܫܒܝܠ̈ܐ ܘܬܘܩܢ̈ܐ ܟܠܣܝܟܝ̈ܐ ܕܡܝܢ̈ܐ ܠܫܒܝܠ̈ܐ ܕܨܢܥܬܝܗܝ ܡܢ ܩܕܝܡ،ܛܥܝܢ̈ܐ ܥܡܝܗܝ ܚܕ ܫܘܦܐ ܡܢ ܬܫܥܝܬܢ ܘܡܕܝܢܝܘܬܢ ܘܝܪܬܘܬܢ.
ܐܝܬܠܗ ܫܘܒܗܪܐ ܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܡܩܪܒܬܗ ܣܢܕܬܐ ܪܒܬܐ ܠܡܒܥܢ̈ܐ ܘܡܒܥܢܝ̈ܬܐ، ܡܪ̈ܘܬܐ ܕܐܢܝ ܬܪ̈ܡܝܬܐ ܛܒ̈ܐ.
ܟܪܝܘܬܐ ܚܕܪ ܫܘܦܐ
ܚܦܛ ܫܘܦܐ ܐܠܟܬܪܘܢܝܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܠܡܛܘܪܢܬܐ ܪܩܡܢܬܐ ܘܐܪܫܦܬܐ ܕܐܝܬܘ̈ܬܐ ܕܒܝܬ ܥܬܝܩ̈ܬܐ ܒܫܒܝܠ̈ܐ ܬܘܩܢܝ̈ܐ ܚܕ̈ܬܐ ܐܢܝ ܕܫܒܩܐ ܕܦܝܫܝ ܦܪ̈ܝܣܐ ܒܐܟܣܝܡܐ ܫܦܝܪܐ ܘܚܕܬܐ، ܘܡܬܒܬܝܗܝ ܒܝܢܬ ܐܝܕܬ̈ܐ ܕܡܚܒܢ̈ܐ ܕܝܪܬܘܬܐ، ܘܟܠ ܡܢ ܒܥܐ ܒܫܟܚܬܐ ܘܝܠܦܬܐ ܒܟܠܝܗܝ ܦܢܝܬܐ ܕܐܬܪܐ، ܘܦܪܝܫܐܝܬ ܒܢܝ̈ ܥܡܢ ܐܢܝ ܕܣܗܡܐ ܪܒܐ ܡܢܝܗܝ ܦܝܫܠܗܘܢ ܒܓܠܘ̈ܬܐ ܘܪܚܩܐ ܡܢ ܐܬܪܐ، ܘܟܠ ܗܢܐ ܒܚܕ ܙܪܒܐ ܕܬܘܪܩܬܐ. ܒܕ ܝܗ̄ܒܠܗܘܢ ܗܢ ܫܘܦܐ ܚܕ ܦܘܪܣܐ ܠܩܢܝܬܐ ܕܡܘܕܥܢ̈ܘܬܐ ܥܬܝܪ̈ܐ ܘܒܫ ܫܪܝܪ̈ܐ ܘܒܐܪ̈ܝܟܘܬܐ ܕܩܝܩ̈ܐ ܚܕܪ ܝܪܬܘܬܐ ܕܐܒܗܬܝ̈ܗܝ ، ܒܡܦܠܚܬܐ ܕܫܒܝ̈ܠܐ ܪ̈ܩܡܝܐ ܚܕ̈ܬܐ ܓܘ : ܦܝܠܡ̈ܐ ܕܦܝܕܝܘ، ܐܫܛܪ̈ܐ، ܠܒܘܫ̈ܐ ܝܪ̈ܬܘܬܢܝܐ ܘܐ̄ܚܪ̈ܢܐ. ܘܠܫܩܠܬܐ ܕܝܘܬܪܢܐ ܡܢ ܐܢܝ ܬܘܩܢ̈ܐ ܡܨܝܢܬܐܝܠܗܿ ܠܒܝܬ ܥܬܝܩ̈ܬܐ ܕܪܘܚ ܓܘ ܐܬܝܪܐ ܣܝܡܝܐ ܘܡܙܝܕ ܪܒܐ ܡܢ ܡܘܕܥܢ̈ܘܬܐ ܘܐܫܛܪ̈ܐ ܘܦܝܠܡ̈ܐ ܘܦܝܫ ܚܕ ܩܢܛܪܘܢ ܡܪܕܘܬܢܝܐ ܡܬܕܝܠܢܝܐ ܘܠܚܘܕܝܐ. ܒܥܠܬܐ ܕܐܝܬܠܗ ܒܝܬ ܥܬܝܩ̈ܬܐ ܣܘܪܝܝܐ ܐܢܢܩܝܘܬܐ ܘܒܣܡ ܒܕܝܠܝܘܬܐ، ܒܥܠܬܐ ܕܝܠܗ ܩܕܡܝܐ ܘܠܚܘܕܝܐ ܓܘ ܩܠܝܡܐ ܕܟܘܪܕܣܬܢ ܘܥܝܪܩ ܡܬܕܝܠܢܝܐ ܓܘ ܢܛܪܬܐ ܘܚܘܕܬܐ ( ܬܪܨܬܐ) ܘܓܠܚܬܐ ܕܟܠ ܡܢܕܝ ܕܐܝܬܠܗ ܐܣܘܪܐ ܒܝܪܬܘܬܐ ܡܕܪܘܬܢܝܬܐ ܘܐܡܢܝܬܐ ܘܥܡܡܝܬܐ ܕܒܢܝ̈ ܥܡܢ، ܗܘܠܢܝܐ ܘܠܐ ܗܘܠܢܝܐ، ܘܡܚܙܝܬܐ (ܢܵܘܪܵܐ) ܨܦܝܬܐ ܕܗܦܟܐ ܠܫܘܡܠܝ̈ܐ ܘܡܕܝܢܝܘܬܐ ܕܗܢ ܥܡܐ ܫܪܫܝܐ، ܘܝܨܦܐ ܒܡܐ ܕܚܙܐܠܗ ܡܢ ܥܣܩ̈ܘܬܐ ܘܩܛܪ̈ܐ ܘܐܒܝܕܘܬܐ ܐܢܝ ܕܦܝܫܠܗܘܢ ܚܕ ܣܗܡܐ ܡܢ ܝܪܬܘܬܗ.
ܐܝܬܠܢ ܣܒܪܐ ܕܦܝܫ ܫܘܦܢ ܐܠܟܬܪܘܢܝܐ ܚܕ ܡܢ ܫܒܝ̈ܠܐ ܒܫ ܐܢܢܩܝ̈ܐ ܕܡܥܕܪܢܝ ܝܠܘܦ̈ܐ ܘܒܨܘܝ̈ܐ ܓܘ ܒܘܨܝܝ̈ܗܝ ܝܘܠܦܢܝ̈ܐ ܕܐܝܬܠܗܘܢ ܐܣܘܪܐ ܒܡܪܕܘܬܐ ܣܘܪܝܝܬܐ ܘܡܕܝܢܝܘܬܢ ܘܬܫܥܝܬܢ.